وليه بنخبي ونداري
ونتداري ورا الكراكيب
ونضحك لما يوجعنا
الوجع ويصيب
ونرسم كل يوم رسمه
هلال وصليب
ويخطفنا الأمل واحنا
على التوضيب
ونحلم نلقي وفي بكره
مكان وبراح
وشمس تدفي في بيوتنا
ننام نرتاح
وليه بنخبي اوجاعنا
نسيب الجرح يخدعنا
ويرجعنا الأمل مشاوير
يدغدغ فينا ويكسر
جناح مانطير
ونضحك والقلوب طارحه
ندور فيها عن فرحه
نزوقها بـ١٠٠ طرحه
وهي عجير
وليه بنخبي ونداري
ونتداري ورا الكراكيب
لا فجر يمد في دراعه
ويخطفنا من الالاعيب
وصبح يشوفنا يحدفنا
ويعلقنا من العراقيب
ندور في الفضا يمكن نلاقي حبيب
نلاقي الأرض مبدوره بشك غريب
فنقفل في البيبان تاني
من الزعابيب
نموت من خوفنا ونسلم
لروحنا الديب
■ أشرف الشناوي شاعر عامية وعضو نادي أدب قصر ثقافة المنصورة وعضو مؤسس في صالون عبد الرحمن الخميسي. حاصل على مركز أول شعر عامية كفر الشيخ.. صدر له ديوان "صباح الخير على بلدي".
