اكتب لمين وأنا أصلا شعري
بيكتبنى فى قصايد ع البحر الرايق
بيترجم إحساس جوايا مش عارف
كان ليه متضايق
فى صور حالفه له تفك الضيق
بيبل الريق ويرقص قلبى فى أفراحه
متجدد فى مساه وصباحه
وبحس دفاه ياسلام على لقطة اخدهالى
وأنا مش شيفاه
صورنى صورة اللى يشوفها بيقولى الله
مهو ساحر فنان فى التعبير متمكن جدا
له تأثير.. بيطير ويحط على سطوره شاطر
وبيفرق بحضوره صياد حريف
قابل للصرف وايده فرطة كمان فى المصاريف
أسلحته الكلمة ودرعة الحرف
وبيعرف أمته يغض الطرف
ويحاسب اللى بيجى عليه
بلغات الدنيا بيتكلم متعلم صح...
و بيعلم مع انه حنون
!!! هجاء ولسانه سلاح مسنون
فى الجد تشوف اعقل مجنون
ميهونش عليه حد.. ولا يهون
على حد يقول شئ بقى عنه حبيب..
محبوب ومفيش منه.. راضى ومتصالح
ومعلم بيصالح الكل وبيسلم بالخير والحب
وداد بيقصر فى المسافات
بوستجى ومعاه كل الجوابات
مختومة بعلم وصول مضمون
بيلف الكون ولا بيكلش
برسايل صابحة مابتملش ولا يضايق
علشان كدا أنا سيباه يكتب
احساسى على البحر الرايق
■ إيمان مصطفى ليسانس آداب جامعة المنصورة،عضو اتحاد كتاب مصر، مثلت مصر فى ملتقى الشارقة للشعر الشعبي ٢٠١٧وحصلت على درع مهرجان الشارقة للشعر الشعبي ٢٠١٨، حصلت على درع جامعة المنصورة فى الشعر (جائزة مهرجان همسة الدولى للآداب والفنون دورة سعد الدين وهبة فى شعر العامية) عام ٢٠١٥ والمركز الأول فى مسابقة نقابة المهندسين ٢٠١٧.
أخبار متعلقة :