وجه الإعلامي الرياضي إبراهيم فايق، رسائل لجماهير نادي الزمالك بعد حديثه عن صفقة المغربي أشرف بن شرقي بالنادي الأهلي.

وكتب فايق عبر حسابه الشخصي على فيسبوك: “حابب أوضح نقطة مهمة لجمهور الزمالك على السوشيال ميديا.. لأنهم هيفضلوا طول الوقت لهم تقدير كبير جدا عندي.. وبيننا مواقف كتير محترمة بدأت من زمن ومستمرة إلى ما لا نهاية، البعض زعل مني امبارح ظنا منهم اني في البوستات بتاعتي عن صفقة بن شرقي كنت فرحان وده طبعا محصلش أبدا”.

وتابع: “اللي حصل واللي الكل شافه اني كنت برد على بعض الشخصيات ممن قللت من مصداقية كلامي فكان لابد من الرد بحسم دفاعا عن شغلي ومصداقيتي.. والبعض الآخر كنت بهزر معاه من باب المحبة لأنه سخر مني وقالي حط بن شرقي على الشاحن.. دون تفريق بين كونه زمالكاوي او أهلاوي زي ما حصل مع مشجع طلع اهلاوي ودمه خفيف واخدنا الموضوع بتهريج”.

وأضاف: “النهاردة لاحظت ان الناس مكانتش متابعه امبارح فبعض الصفحات نشرت كلام مخالف للواقع، الغرض منه تحويل غضب جمهور الزمالك من توقيع بن شرقي للأهلي للغضب مني شخصيا بقصد وتعمد كاذب للأسف”.

واختتم: "علشان كده أنا بكتب البوست ده بمنتهى التقدير والمحبة ومصحوب بشكر لكل الناس اللي ردت عني ووضحت الموضوع، هفضل طول الوقت حريص على علاقتي بجمهور الزمالك زي حرصي على علاقتي بجمهور الأهلي.. وارد تختلف معايا جدا وتنتقدني بس يفضل الاحترام بينا مستمر".